Nortzuk gara
Astigarragako Norberto Almandoz Musika Eskola 1994. urtean jarri zen martxan herriko jende-talde baten ekimenez eta Udalaren parte-hartze eta laguntzarekin. Irabazteko asmorik gabeko Elkarte batek eratuta eta kudeatuta dago. Gurasoen kuoten bitartez finantzatzen da, baita Udalak eta Eusko Jaurlaritzak emandako dirulaguntzen bitartez ere.
Bere hastapenetan NAME-k 48 ikasle eta 4 irakasle zituen. Urteen poderioz, Eskolak hazkunde nabarmena izan du ikasle, irakasle eta irakasgai-kopuruari dagokionez, eta gaur egun 350en bat ikasle, 13 irakasle eta musika-tresna eta ikasgai-aukera handia izatera heldu da.
2008. urteaz geroztik 0 eta 3 urte bitarteko haurtxoentzat Musika Hezkuntza Goiztiarreko tailerra antolatzen da –arrakasta nabarmenaz antolatu ere–, eta Euskadin aitzindari izan den tailer honetan haurrek garrantzi handiko gaiak lantzen dituzte, besteak beste, psikomotrizitatea, erritmoa, musikaltasuna…
Ikasturtearen barruan ME-ak hainbat ekintza antolatzen ditu musika herriratu eta herriko biztanle guztiak horren partaide egiteko. Hori dela eta, ondoko ekintzak ditu bere programazioan jasota:
- Hiru hilean behingo entzunaldiak, Gabonetako Kontzertua eta Musika Eguna.
- NAME-k Euskal Herriko Musika Elkartearekin (EHME) eta Gipuzkoako Musika Eskolekin elkar lanean dihardu; horrez gain, Musika eskolen arteko trukaketetan, Alardeetan eta Musikalean (Santa Zezilia) eta Musikaldi gisako ekimenetan ere hartzen du parte.
- Maiatzean, eskola ezagutu nahi duten guztiei zuzenduta, jardunaldi bat antolatzen da. Eta eskolan izen emateko epea ere hil horretan bertan zabaltzen da.
Musika-tresnak: gitarra, baxua, kitarra elektrikoa, pianoa, biolina, trikitixa, eskusoinua, pandero-kutxara, zeharkako txirula, tronpeta, bonbardinoa, saxofoia, klarinetea, kantua, biola, bateria, perkusioa eta txistua.
Ikasgaiak: Musika Hezkuntza Goiztiarra (Tailerra 0-3), Musika eta Mugimendu Tailerra (4-6- urte), Musika-Hizkuntza, Abesbatza eta musika-tresnen taldeak/konboak.
